Әскерилерге өтемақы қалай берілетіні белгілі болды

Қазақстан Үкіметі 2026 жылғы 8 мамырдағы қаулысымен әскери қызметшілерге тұрғын үй төлемдерін жүзеге асыру ережелеріне өзгерістер енгізді. Жаңа ережелер осы жылдың 19 мамырынан бастап күшіне енеді.

Құжатқа сәйкес, ақшалай өтемақы – әскери қызмет және әскери қызметшілердің мәртебесі туралы заңнамада көзделген жағдайларда берілетін біржолғы сипаттағы тұрғын үй төлемдері.

Кімдер өтемақы ала алады?

Төлемдерді алуға келесі санаттағы әскери қызметшілер құқылы:

• 2013 жылғы 1 қаңтардағы жағдай бойынша 10 жыл және одан да көп еңбек өтілі барлар;

• 20 жыл қызметтен кейін қызметтік тұрғын үйді өтеусіз жекешелендіруге құқығы барлар;

• Жекешелендіруге жатпайтын қызметтік пәтерлерде тұратын тұлғалар.

Өтемақы қалай есептеледі?

Төлем мөлшері арнайы формула бойынша анықталады: Қазақстан бойынша жаңа тұрғын үйдің бір шаршы метрінің орташа құны (қаңтар айындағы статистика бойынша) отбасының әрбір мүшесіне шаққандағы 18 шаршы метрге көбейтіледі. Бұл сомадан бұрын алынған тұрғын үй төлемдері шегеріледі.

Қандай шектеулер бар?

Егер әскери қызметшінің немесе оның жұбайының меншігінде баспанасы болса, бұрын жекешелендіру құқығын пайдаланса немесе соңғы 5 жылда жылжымайтын мүлікті иеліктен шығарса (сатса, сыйға тартса), өтемақы төленбейді.

Өтемақы бұйрық шыққаннан кейін бір ай ішінде арнайы банктік шотқа аударылады. Қаражаттың нысаналы пайдаланылғанын растайтын құжаттарды 6 ай ішінде ұсыну қажет.