Әскери қызметтің артықшылықтары қандай? Министрлік түсіндіру науқанына кірісті

Қорғаныс министрлігінің ақпараттық-түсіндіру тобы азаматтармен кездесу жұмыстарын күшейтіп, әскери қызмет, әлеуметтік кепілдіктер және жастарға арналған жаңа мүмкіндіктер туралы кең көлемде түсіндіру науқанын жалғастырып жатыр. «Біртұтас ел – біртұтас жер» атты әскери-патриоттық акция Қарағандыдан Қостанайға дейінгі ондаған елді мекенді қамтыды.

Ведомствоның хабарлауынша, Қорғаныс министрлігі әскери қызметтің ашықтығын арттыруға, қоғамның сенімін күшейтуге және әскери мамандықтың беделін көтеруге басымдық береді. Осы мақсатта әскери қызметшілер мерзімді қызмет өткеру, әскери жоғары оқу орындарына түсу тәртібі, әлеуметтік кепілдіктер мен жеңілдіктер туралы ақпаратты әртүрлі жастағы азаматтарға жан-жақты түсіндіріп жүр. Кездесулер оқушылар, студенттер, еңбек ұжымдары және аға буын өкілдерімен өткізіліп жатыр.

«Біртұтас ел – біртұтас жер» акциясы осы жұмыстың негізгі бөлігіне айналды. Қарағанды облысында түсіндіру шаралары облыс орталығында, сондай-ақ Қарқаралы, Шахтинск және Теміртау қалаларында өтті. Ал Қостанай облысында әскерилер Қостанай, Рудный және Тобыл қалаларында болып, жастармен және жергілікті тұрғындармен кездесті.

Бағдарлама Жеңістің 80 жылдығына арналған көшпелі көрмелермен толықтырылған. Сонымен қатар Ұлттық әскери-патриоттық орталық ансамблінің әртістері концерттік бағдарлама ұсынып, әскери рухты, жауынгерлік дәстүрді және Отан қорғаушы рөлінің маңызын сезінуге мүмкіндік береді.

Акция аясында отбасылық құндылықтарға да ерекше мән беріледі. Мамандар ата-аналардың ел тарихын құрметтеу арқылы балаларға жауапкершілік пен Отанға деген сүйіспеншілік сезімін қалыптастырудағы рөлін түсіндіріп жатыр. Бала тәрбиесіндегі белсенді азаматтық ұстаным – болашақ Қазақстан қорғаушыларын тәрбиелеудің маңызды бөлігі екені атап өтілді.