Әскерге сау кетіп, арбаға таңылып оралды: сарбаздың туыстары әділдік іздейді

Шымкенттен әскерге аттанған Өмірбек Сұлтанмұратов үш жылдан бері өздігінен жүре алмайды. Оның туыстары жігіттің денсаулығы әскерде не себепті күрт нашарлағанын анықтап, істің тексерілуін талап етіп отыр. Бұл туралы 31 арнаның «Информбюро» бағдарламасында айтылды.

Өмірбек 18 жасында Павлодардағы 5512 әскери бөлімінде Ұлттық ұлан сапында қызмет еткен. Әскерден қайтуына бір ай қалғанда денсаулығы күрт нашарлап, басына ота жасалған. Дәрігерлер оған менингит диагнозын қойған.

Алайда отбасы баласының қазіргі жағдайын тек аурумен байланыстырмайды. Туыстары оның әскерде соққыға ұшыраған болуы мүмкін екенін айтып отыр. Бұл – отбасының болжамы, оны растайтын тергеу қорытындысы материалда келтірілмеген.

«Ауырса, армияда неге қарамады? Сап-сау кетіп еді ғой. Командирлеріне ауырып жатқанын айтқанын кейін естідім. Дәрігерге апарыңдаршы деген өтінішіне ешкім құлақ түрмеген. Әбден комаға түскенде ғана апарған», – дейді анасы Мадина Шұқамбаева.

Әкесі Рустамбек Шұқамбаев баласын әскери комиссариатқа өзі апарғанын айтып, сол шешіміне өкінетінін жеткізді. Отбасының сөзінше, Өмірбек әскерге дейін спортпен айналысып, көкпар тартқан және әскери қызметші болуды армандаған.

Ата-анасы үш жылдан бері баласын емдетіп келеді. Олардың айтуынша, Өмірбектің мұндай жағдайға қалай түскені әлі анықталмаған және осы оқиғаға байланысты қылмыстық іс қозғалмаған.

2023 жылдан бері төсекке таңылған Өмірбек кейінгі уақытта ғана ата-анасын тани бастаған. Денсаулығына байланысты ол әскерде не болғанын өзі айтып бере алмайды.