Әскерге кеткендерге несие берілмеуі мүмкін

Қазақстанда мерзімді әскери қызметке шақырылған азаматтарға несие беруге шектеу енгізілуі мүмкін. Бұл жөнінде Қаржы нарығын реттеу және дамыту агенттігі әзірлеген қаулы жобасында көрсетілген. Құжат 19 қаңтар күні «Ашық НҚА» порталында жарияланды.

Жобаға сәйкес, агенттік мерзімді әскери қызметтегі азаматтар туралы мәлімет алмасу тәртібін бекітуді ұсынып отыр. Атап айтқанда, Қорғаныс министрлігі мен кредиттік бюролар арасында әскери қызметке шақырылғандар, олардың қызметтен босатылуы, банктік қарыз бен микрокредитінің бар-жоғы, сондай-ақ қарыз төлемін кейінге шегеру деректері бойынша ақпарат алмасу көзделген.

Бұл бастама Мемлекет басшысы жуырда қол қойған банктер және банк қызметі туралы жаңа заңды іске асыру аясында әзірленген.

Құжатта көрсетілгендей, аталған ақпарат алмасу тетігі мерзімді әскери қызметке шақырылған азаматтарға несие төлемін кейінге қалдыру мүмкіндігін беру және бұл деректерді жеке тұлғаның кредиттік есебінде көрсету үшін қажет.

Сонымен қатар, жоба банктер мен микроқаржы ұйымдарын әскерге шақыру жасындағы азаматтардың несие алуға берген өтінімдерін міндетті түрде кредиттік есеп арқылы тексеруге міндеттейді. Егер өтініш берушінің мерзімді әскери қызмет өткеріп жатқаны анықталса, несие беруден бас тарту қарастырылған.

Қаулы жобасы 3 ақпанға дейін қоғамдық талқылауға шығарылған.