Әскердегі былық: Қорғаныс министрлігін тексеру кезінде 13 қылмыстық іс қозғалды

Қорғаныс министрлігін кешенді тексерудің бірінші кезеңінде 13 қылмыстық іс қозғалды. Бес лауазымды тұлға қамауға алынды. Комиссия жұмысының алғашқы нәтижесін Президент Қасым-Жомарт Тоқаев тыңдады, деп хабарлады Ақорда.

Комиссия төрағасы, Қауіпсіздік Кеңесі Төрағасының орынбасары Аида Балаева тексерістің негізгі бағыттары бойынша қорытындыны баяндады. Жиында Маңғыстау облысындағы әскери оқу-жаттығу кезіндегі қайғылы оқиға Қарулы күштерде қордаланған жүйелі мәселелерді көрсеткені айтылды.

Алдын ала тергеу нәтижесі әскери іс-шараларды жоспарлау кезінде өрескел қателіктер жіберілгенін және бұрынғы басшылық тарапынан тиісті бақылау болмағанын көрсеткен. Маңғыстаудағы оқиғаны зерттеу барысында тәуекелдерді бағалау, десант түсіру, оқу-жаттығуды дайындау мен жоспарлау және әскери қызметшілердің қауіпсіздігін қамтамасыз ету ісінен елеулі кемшіліктер анықталған.

Қазір қолбасшылық құрамның салғырттығына қатысты сотқа дейінгі тергеу жалғасып жатыр. Бес лауазымды тұлға қамауға алынған. Олардың әрекетіне түпкілікті құқықтық баға тергеу аяқталғаннан кейін беріледі.

Кешенді тексерудің алғашқы кезеңінде қылмыстық қудалау органдары мемлекет мүлкін талан-таражға салу, қызметтік өкілеттіктерді асыра пайдалану және Қорғаныс министрлігіне қарасты ұйымдар мен құрылымдық бөлімшелердегі басқа да заң бұзушылықтар бойынша 13 қылмыстық іс қозғаған.

Сонымен бірге әскери тәртіп пен алдын алу жұмыстарынан да кемшіліктер анықталды. Әскери қызметшілерге әлімжеттік жасау және жарғы талаптарына қайшы әрекеттер бойынша қылмыстық істер қозғалған.

Тоқаев алғашқы кадрлық шешімдер қабылданғанын атап өтіп, әскери қызметшілердің қазасына кінәлі лауазымды тұлғалардың барлығы заңға сәйкес жауапқа тартылуға тиіс екенін мәлімдеді. Президент бұл мәселені жеке бақылауында ұстайтынын айтты.

Мемлекет басшысы комиссияға Қорғаныс министрлігінің жаңа басшылығымен бірге анықталған кемшіліктерді жою жөнінде нақты ұсыныстар әзірлеуді тапсырды. Тексеру қорытындысы Қарулы күштерді реформалау жоспарын дайындау кезінде ескерілмек.

Комиссия жұмысы жалғасып жатыр.