$ 447.8 € 516.76 ₽ 5.3

Арыста тағы жарылыс дауысы естілді: Қорғаныс министрлігі не дейді (ВИДЕО)

Абдрахманов Мағжан
20 тамыз 2026, 10:23
Арыста тағы жарылыс дауысы естілді: Қорғаныс министрлігі не дейді (ВИДЕО) Сурет авторы: видеодан кадр

Арыста әскери бөлімдердің бірінің аумағында құрғақ шөп өртеніп, өрт кезінде жоюға дайындалған оқ-дәрінің бөлшегі жарылды. Зардап шеккендер мен қираған нысандар жоқ, деп хабарлады Шымкент гарнизонының баспасөз қызметі.

19 тамызда әлеуметтік желілерде Арыс маңынан түтін шығып, жарылысқа ұқсас дауыс естілген бейнежазбалар тараған. Гарнизон мәліметінше, оқиға сол күні сағат 19:00 шамасында болған.

«Арыс гарнизонындағы әскери бөлімдердің бірінің техникалық аумағында құрғақ шөп өртенді. Өрт кезінде алдын ала жоюға дайындалған оқ-дәрі бөлшегі жарылды. Зардап шеккендер мен қираған нысандар жоқ», – делінген хабарламада.

Қорғаныс министрлігі жағдай бақылауда екенін мәлімдеді. Өрт толық сөндірілген, оқиға орнында тиісті қызметтер жұмыс істеп жатыр.

Арыста бұған дейін де әскери қоймада ірі жарылыс болған. 2019 жылғы 24 маусымда әскери бөлім қоймасындағы өрттен оқ-дәрілер жарылып, үш адам қаза тауып, 100-ден астам адам зардап шеккен.

Осы оқиғаға қатысты сот 2020 жылы басталды. Іс бойынша 16 адам айыпталып, 1500 адам жәбірленуші деп танылған. Сот 12 адамды 4 жылдан 10 жылға дейін бас бостандығынан айырған.

#Арыс #Жарылыс

Соңғы жаңалықтар