Аружан Саин қаңғыбас иттердің балаларға шабуылы жалғасуы мүмкін екенін жоққа шығармайды

Қазақстан баспасөз клубының алаңында өткен конференцияда жануарларды қорғаушылар мен қоғам белсендісі Аружан Саин қаңғыбас жануарларды эвтаназиялау (ұйықтату) туралы заң жобасына қарсылық білдірді. Алайда, жиын барысында спикерлердің қаңғыбас иттердің қауіптілігі мен балалардың өміріне қатысты айтқан пікірлері қоғамда үлкен пікірталас тудырды.

Журналистер тарапынан қойылған «Қайсысы маңызды: қаңғыбас иттердің өмірі ме, әлде балалардың өмірі ме?» деген тікелей сұраққа жауап берген Аружан Саин қайғылы оқиғаларды жаһандық мәселелермен салыстыруды жөн көрді. Ол 2022 жылы Ақтөбе облысында иттер тобы баланы талап өлтірген жағдайды мысалға алған журналиске, балалардың өлімі тек жануарлардан емес, соғыс қақтығыстарынан, тұрмыстық жарақаттардан және қылмыскерлердің қолынан да болатынын алға тартты.

«Бір-бірімізді және балаларымызды толық қорғағымыз келеді, бірақ бәрінен толықтай қорғау әрдайым мүмкін бола бермейді», - деді А. Саин.

Сонымен қатар қоғам белсендісі орын алған қайғылы жағдайлар үшін жауапкершілікті ішінара ата-аналарға жүктеді. Оның пайымдауынша, жануарлар агрессия көрсеткен жағдайда, ересектер баланың қауіпті аймақта болуына жол бермеуі тиіс.

«Бала өзіне қауіп төнуі мүмкін жерде болмауы тиіс. Бұл тек жануарлардың ғана емес, ересектердің де жауапкершілігі», — деп атап өтті ол.

Қазіргі таңда жануарларды қорғаушылар қаңғыбас иттердің санын реттеудің жалғыз жолы ретінде тек стерилизациялауды қолдап отыр. Дегенмен, бұл әдіс жануарлардың көшеде қалуына және олардың аштық немесе басқа да факторлар әсерінен агрессия көрсету мүмкіндігін толық жоймайтыны туралы сарапшылардың пікірі ескерілмеді.

Бұл мәлімдеме қоғамда «гуманизм принциптері адам өмірінен жоғары тұруы тиіс пе?» деген заңды сауал мен наразылық толқынын туғызып отыр.