Арсен Томский мына мамандарға қазір-ақ ақша беруге дайын

inDrive компаниясының негізін қалаушы, белгілі кәсіпкер Арсен Томский Алматыдағы қысқы смогтың себептері мен оны шешудің ғылыми жолдарын талқылап, осы бағытта жұмыс істей алатын мамандарды іздейтінін мәлімдеді. Бұл жөнінде digitalbusiness.kz хабарлады.

Егер сіз атмосфера физигі, геофизик немесе климаттық модельдеу бойынша маман болсаңыз, онда сізге кәсіпкердің нақты ұсынысы бар. Бұл – жалақы төленетін ғылыми жоба.

«Бізге Almaty Air Initiative жобасына атмосфера физигі, геофизик және күрделі климаттық процестерді модельдей алатын мамандар қажет. Олар инверсиялық қабаттың динамикасын есептеп, ауа ағыны мен турбуленттілікті модельдеуі керек. Сондай-ақ көтерілу ағыны смогты бұзып шыға ала ма, қанша ағаш қажет және бұл модель жалпы жұмыс істей ме — соны анықтауы тиіс. Бұл – ақылы келісімшарт, шығынды мен немесе қор төлейді», – деді Арсен Томский.

Алматы неге тұншығады

Томскийдің айтуынша, Алматыдағы қысқы тұманның негізгі себебі – қаланың географиялық орналасуы.

«Қала оңтүстігінде таулармен, солтүстігінде төбелермен қоршалған “шағын шұңқырда” орналасқан. Күзде 800–1000 метр биіктікте инверсиялық қабат түзіліп, ауаның қозғалысын тежейді. Ал төменде жылу электр станциялары, жеке үйлер мен көліктер күн сайын атмосфераға орасан көлемде қалдық шығарады. Осылайша, Алматы “газдық тұтқында” қалады», – деп түсіндірді кәсіпкер.

Ғылыми шешім қандай болуы мүмкін?

Арсен Томский қазақстандық ғалым Серік Бүркітбаевтың идеясын мысалға келтірді.

«Ол қаланың солтүстік бөлігінде, Қапшағай маңындағы төбелерде көп мөлшерде ағаш отырғызуды ұсынды. Күндіз ағаштар күн жылуын жинайды, ал түнде оны шығарып, жылы ауа ағынын тудырады. Бұл ағын инверсиялық қабатты бұзып, смогты жоғары көтеріп, қаладан сыртқа шығара алады. Түнде тұман солтүстікке қарай жиналады, сондықтан оны дәл осы жерден “сорып” шығару мүмкін», – дейді Томский.

Кәсіпкердің айтуынша, бұл бастама Алматының экологиялық жағдайын жақсартуға бағытталған Almaty Air Initiative жобасының бір бөлігі.

Ол мұндай ғалымдарды білетіндер болса, байланыс орнатуды сұрады.