Арқалықта тойдан кейін 85 адам уланып қалды: арасында жүкті әйел мен балалар бар

Арқалық қаласындағы кафелердің бірінде өткен тойдан кейін 85 адам тағамнан уланып, ауруханаға жеткізілді. Бұл туралы «Наша газета» хабарлады. Облыстық денсаулық сақтау басқармасы бұл деректі растады.

Әлеуметтік желілерде жарияланған ақпаратқа сәйкес, той отбасылық 60 жылдық мерекеге арналған болған.

Қостанай облысы денсаулық сақтау басқармасы басшысының орынбасары Айдана Бүркітбаеваның мәліметінше, зардап шеккендердің 27-сі – Жангелдин аудандық ауруханасында, 52 адам – Арқалықта, ал 6 адам – облыстық ауруханада ем қабылдап жатыр.

«Зардап шеккендердің арасында жүкті әйел мен жеті бала бар. Барлығының жағдайы қанағаттанарлық, өміріне қауіп жоқ. Санавиация желісі арқылы құрамында инфекционистер, терапевттер мен педиатрлар бар арнайы мамандар бригадасы жолданды», – деді Айдана Бүркітбаева.

Тек үш адам ғана ауруханаға жатудан бас тартқан.

Қазіргі уақытта кафенің қызметі тоқтатылып, мамандар тағам мен ауыз судан сынама алып, персоналды медициналық тексеруден өткізді. Зерттеу нәтижелері әзірге дайын емес. 

Полиция бұл факт бойынша Қылмыстық кодекстің «Санитарлық ережелерді немесе гигиеналық нормативтерді бұзу» бабымен тергеу амалдарын бастады.