Ардагерге тағзым: «Астана Тазалықта» Отан қорғаушылар күнін ерекше атап өтті

Отан қорғаушылар күні мен Жеңіс күніне орай «Астана Тазалық» компаниясында ерекше шара өтті. Мұнда Ауған соғысына қатысқан ардагерлерге құрмет көрсетіліп, олардың өткен соғыс жылдарының ауыр сынақтары мен бейбіт өмір үшін күрестегі ерліктері жоғары бағаланды. Бұл күні шараға қатысушылар ардагерлердің батырлығы мен азаматтық борышын орындаудағы жанқиярлық еңбектеріне тәнті болды. Расымен де аға буының дара жолы жас ұрпаққа үлгі боларлық өнеге.  

«Бүгінгі жастарға тек техника мен білім ғана емес, адамгершілік құндылықтар да қажет. Ал ардагерлердің өмірі – осы құндылықтардың барлығын бойына сіңірген жарқын үлгі. Олардан біз шынайы отаншылдық, ар-намыс және жауапкершіліктің мәнін үйренеміз», – дейді компания басшылығы.  

Ардагерлердің ерліктері мен бейбіт өмірді қорғау жолындағы қажырлы еңбектері ешқашан ұмытылмауы тиіс. Олардың тәжірибесі жастар үшін қымбат тәлім болып қала бермек.  

Мерекеге арнайы – Виктор Евгеньевич Подручный қатысты. Алпысты алқымдаған азамат Ауған соғысының ардагері. Небәрі 20 жасында Түркістан әскери округіне шақыртылып, Ауғанстанға аттанған. Бүгінгі күннің батыры өзінің өмір жолынын сол бір кезеңдерін есіне алды.  

 «Жолда оқ-дәрі, азық-түлік және құрылыс материалдарын тасымалдау біздің басты міндетіміз болды. Сол кезеңде техниканың көпшілігі ескі еді, сондықтан көбінесе көліктердің тек үштен бірі ғана межелі жерге жететін. Дегенмен, бұл да өз уақытында жақсы нәтиже деп бағаланды», – дейді Виктор Евгеньевич. 

Жауынгерлік жылдарынан кейін Виктор Евгеньевич елге оралып бірден қызметке кірісті. Ол бүгінде «Астана Тазалық» мекемесінде арнайы техника жүргізушісі болып жұмыс істейді. Ауыр техника тізгіндеген маман 17 жылдан астам уақыт осы салада еңбек етіп келеді. Жұмысына адал, ұжым ішінде беделді жан.  

«Мен өз жұмысымды жақсы көремін. Бұл жерде әріптестерім мен басшылықтың қолдауы мен сенімдерін үнемі сеземін. Ең бастысы мұнда әділдік бар, еңбек адамдарына деген шынайы құрмет бар. Үлкен серіктестіктің бір бөлшегі болу мен үшін үлкен мәртебе», – дейді ардагер.