«Әрбір теңгенің мақсатты жұмсалуын қатаң бақылауда ұстаймыз» – Альберт Рау

Қостанай облысындағы Николаевка ауылында көптеген жылдар бойы ауыз су мәселесі туындап келген болатын. Енді елді мекенде орталықтандырылған су жүйесі іске қосылып, ауыл тұрғындары таза ауызсумен қамтылмақ. «AMANAT» партиясының бастамасымен жүзеге асып жатқан орталықтандырылған сумен жабдықтау жүйесінің құрылысы осы жылдың қараша айында аяқталмақ. Құрылыстың барысымен Мәжіліс төрағасының орынбасары Альберт Рау мен депутат Еркін Әбіл танысты.

Құны 1,3 млрд теңгені құрайтын нысанның бүгінде 50 пайызы дайын. 11 шақырым жерге су құбыры тартылып, құдықтар орнатылып, сорғы станциялары құрылды. Сондай-ақ дәнекерлеу және электр-техникалық жұмыстар аяқталды. Жоба Бейімбет Майлин ауданының барлық халқын ауызсумен қамтуға мүмкіндік береді.

Альберт Раудың айтуынша, еліміздегі барлық елді мекендерді 100 пайыз таза ауызсумен қамту – «AMANAT» партиясының сайлауалды бағдарламасындағы негізгі міндеттің бірі. Ол партия фракциясының депутаттары жыл сайын ондаған ауылды ауыз сумен қамту жобаларын бюджет жоспарына енгізуге ықпал етіп келе жатқанын жеткізді. Бұған дейін елімізде шамамен 700 ауылда ауыз су мүлде болмағанын, жүргізілген жұмыстардың арқасында айтарлықтай нәтижеге қол жеткізілгенін айтты.

Сонымен қатар Рау арнайы мемлекеттік қордан қосымша қаражат тартылғанын еске салды. Бұған дейін жемқорлардан тәркіленген қаржы тек мектеп құрылысына жұмсалса, қазір ол халықтың күнделікті тұрмысымен тікелей байланысты жобаларға да бағытталатынын атап өтті. Оның айтуынша, осының арқасында жүздеген ауылға су құбыры тарту мүмкіндігі туған. Дегенмен бірінші кезекте – ауыз су мәселесі шешілуі тиіс. Сондай-ақ ол әкімдіктермен және мәслихаттармен бірлесіп, әрбір теңгенің мақсатты жұмсалуын қатаң бақылауда ұстайтындарын айтты.

Депутаттар жергілікті билік өкілдері мен мердігер ұйымдардың ауылдарды орталықтандырылған сумен жабдықтау мәселесіне қатысты есептерін тыңдап, әрбір су нысаны бойынша жұмыс кестесін қарады.