"Арандатушыларға ермейік": Қырғызстан президенті қазақстандықтарға үндеу жасады

Қырғызстан Президенті Садыр Жапаров Facebook парақшасында қазақ пен қырғыз халықтары арасындағы достықты насихаттап, соңғы уақытта тараған арандатушы видеоларға қатысты мәлімдеме жасады. Ол екі ел арасындағы тарихи бауырмалдық пен ынтымақты бұзғысы келетін әрекеттерге қарсы екенін білдірді.

Президент жазбасында қазақ пен қырғыздың ежелден туыстас, мақсат-мүддесі бір халықтар екенін атап өтті. Ол белгілі ақын Жұбан Молдағалиевтің:

«Мен – қазақпын, қырғыз – ол туысқаным,
Бірге тартқан тарланның құйысқанын...» — деген жолдарын келтіре отырып, қос халықтың рухани байланысын ерекше атап өтті.

Жапаров Кенесары хан мен Ормон хан арасындағы тарихи оқиғаларға қатысты жалған және бұрмаланған ақпарат таратушылардың әрекетін сынға алды. Ол бұл тақырыпты жақсы білетінін, әкесінен және тарихи еңбектерден көп дерек алғанын айтты. Сол деректерге сүйене отырып, Кенесары ханның қырғыз жеріне басып кіріп, Шу-Токмок өңірінде шайқасып, жеңіліс тапқанын және бұл қақтығыста орыс әскерінің көмегі болмағанын мәлім етті.

Садыр Жапаров қазіргі уақытта кейбір топтардың тарихи деректерді бұрмалап, екі халықты бір-біріне қарсы қоюға тырысып жатқанын атап өтті. Мұндай арандатуларға жол беруге болмайтынын, бүгінгі таңда қазақ пен қырғыздың басты міндеті – ұлттық мемлекетті нығайту мен өзара достықты сақтау екенін баса айтты.

«Мен өзім де қазақ халқымен туыспын. Төртінші атам Солтонқұлдың бәйбішесі – қазақ қызы Нооча болған. Демек, мен қазаққа жиенмін. Мұндай туыстық байланыстар екі елде де көп. Сондықтан екі халықтың арасындағы достық пен ынтымақты сақтау – баршамыздың ортақ борышымыз», – деді Жапаров.

Ол жастарды арандатушыларға ермеуге, тарихты әділ зерттеуге және мәңгілік достықты бекемдеуге шақырды.

«Ынтымағы бар елден ырыс кетпейді. Бірлікте болайық!» – деп түйіндеді Қырғызстан Президенті.