Apple өнімдері қымбаттайды: Тим Кук бағаның өсуін растады

Apple алдағы уақытта өз өнімдерінің бағасын көтеруді жоспарлап отыр. Бұл туралы компанияның бас директоры Тим Кук мәлімдеді.

Оның айтуынша, соңғы уақытта жад сақтау құрылғылары мен жедел жады чиптерінің құны өскен. Бұған жасанды интеллект технологияларының қарқынды дамуы себеп болып отыр. 

Тим Кук компания ұзақ уақыт бойы қосымша шығындарды өз есебінен жауып келгенін, алайда қазіргі жағдайда бағаны бұрынғы деңгейде ұстап тұру қиындай түскенін айтты.

«Жеткізушілер тарапынан баға өсіп жатыр. Біз тұтынушыларды бұл өзгерістерден қорғауға тырыстық, бірақ қазіргі жағдай ұзақ уақыт сақталуы мүмкін емес», – деді ол.

Apple басшысы нақты қандай құрылғылардың қымбаттайтынын және бағаның қанша пайызға өсетінін нақтылаған жоқ. Дегенмен компания қыркүйек айында жаңа буындағы құрылғыларын, соның ішінде алғашқы жиналмалы iPhone моделін, сондай-ақ iPhone 18 Pro және Pro Max смартфондарын таныстыруды жоспарлап отыр. Куктың сөзінше, компанияны әсіресе DRAM жедел жады нарығындағы жағдай алаңдатады. Өндірушілер жоғары өнімді жасанды интеллект серверлеріне арналған жад модульдерін шығаруға басымдық беріп жатқандықтан, тұтынушылық электроникаға арналған компоненттер көлемі қысқарып келеді.

Осыған байланысты Apple балама жеткізушілерді іздестіріп жатыр. Компания қажет болған жағдайда қытайлық өндірушілермен де жұмыс істеуге дайын екенін білдірді. Сонымен қатар Apple өндіріс көлемін арттыру үшін қаржылай қолдау көрсету мүмкіндігін қарастырғанымен, жад чиптерін шығаратын жеке зауыт салуды жоспарламайды.