«Ананың бас бармағындай ғана қол»: Газадағы аштықтың көрінісі

Газадағы гуманитарлық дағдарыс күннен күнге күшейіп барады. Reuters-тің хабарлауынша, Хан Юнис қаласында орналасқан Нассер ауруханасында аштықтан әбден әлсіреген балаларға шұғыл көмек көрсетіліп жатыр. Дәрігерлер кейбір бүлдіршіндердің қолы ананың бас бармағындай ғана жіңішкергенін айтады – бұл аймақтағы қолдан жасалған адам қырғынының айқын көрінісі.

Дәрігерлер арнайы тағам мен дәрі-дәрмек тапшылығы емделушілердің өмірін сақтап қалуды қиындатып отырғанын айтады.

БҰҰ мен Дүниежүзілік денсаулық сақтау ұйымы аймақтағы жағдайды «жасанды аштық дағдарысы» деп атап, балалардың арасында ауыр тамақтану тапшылығы мен өлім-жітімнің өсу қаупі барын ескертті. Халықаралық ұйымдар Газаға шұғыл әрі ауқымды гуманитарлық көмек қажет екенін мәлімдеді.

Еске салсақ, Израиль наурыз айында жабық режим енгізіп, азық-түлік пен дәрі-дәрмек жеткізуге тыйым салған еді. Бүгін де кей шектеулер жеңілдетілгенімен, гуманитарлық көмектің көлемі әлі де жеткіліксіз. 

Соғыс басталғалы бері Палестинаның тәуелсіздігін 17 ел ресми түрде мойындағаны жарияланды. Сарапшылардың пікірінше, бұл шешім Газаға халықаралық назарды арттырып, гуманитарлық көмек ағынын күшейтуі мүмкін.

Автор: Рахат Жора