«Аналитика да, түзету де жоқ»: Қошановтың мақтауына ие болған Базарбек Ұлттық экономика министрлігін сынға алды

Мәжіліс депутаты Бақытжан Базарбек Ұлттық экономика министрлігін Салық кодексіне қатысты уәде етілген талдау мен түзетулерді ұсынбағаны үшін сынға алды. Бұл мәселе Мәжілістің пленарлық отырысында қаралды.

Депутат жұмыс тобы отырыстарында министрлік өкілдері мамыр-маусым айларында талдау жасап, түзетулер енгізетінін айтқанын еске салды.

«Сіздер: алты ай уақыт беріңіздер, 1 қаңтардан бастап Салық кодексі күшіне енсін, мамыр-маусымда талдаумен келеміз деген едіңіздер. Бірақ бүгінге дейін ешқандай талдау да, түзету де жоқ. Ал қазір бір жыл қажет деп отырсыздар», – деді Базарбек.

Оның бұл сөзіне Мәжіліс спикері Ерлан Қошанов депутаттың есте сақтау қабілетіне ризашылық білдіріп, «жақсы есіңізде сақтап қалыпсыз» деп мақтау айтты.

Базарбек Салық кодексіне қатысты ұстанымы өзгермегенін айтып, кейбір жеңілдіктердің тиімсіз болғанын сынға алды.

«Қосылған құн салығынан босатылғандар – оны төлеуі тиіс болғандар, ал жүктеме қарапайым азаматтарға түсті», – деді ол.

Депутат мысал ретінде авиаотын нарығын келтірді. Оның сөзінше, авиаотынды ҚҚС-тан босату арқылы әуе билеттері арзандауы керек еді, бірақ іс жүзінде баға одан сайын өсе түскен.

«1 қаңтардан бері әуе билеттері арзандаған жоқ, керісінше қымбаттады. Ал авиакомпаниялар 6–7 пайыздық үнемді өздерінде қалдырды», – деді Базарбек.

Ұлттық экономика бірінші вице-министрі Азамат Амрин өз кезегінде министрлік мониторингтен бас тартпайтынын және салықтық кезең аяқталғаннан кейін ғана нақты нәтиже шығатынын түсіндіруге тырысты.

«2027 жылдан бастап біз жыл сайын бюджетпен бірге салықтық шығындар туралы есеп ұсынамыз. Ол жеңілдіктердің тиімділігін бағалауға мүмкіндік береді», – деді ол.

Сонымен қатар вице-министр жартыжылдық қорытындысы бойынша талдау жасалатынын және күзде Салық кодексіне түзетулер енгізілетінін мәлімдеді.

«Алдағы күзде сіздердің алдарыңызға заң жобасымен келеміз», – деді Әмрин.

Айта кетейік, бұған дейін Салық кодексіне өзгерістер екі кезеңмен енгізілетіні хабарланған. Бірінші пакет 1 шілдеге дейін қабылдануы жоспарланып отыр.