Әмина апаның балалар үйі өртенді: тәрбиеленушілерді қайда орналастырады

Алматы қаласында болған өрттен кейін «Перзент» жеке балалар үйінің тәрбиеленушілеріне медициналық және психологиялық көмек көрсетілді.

Өрт 9 қараша кешкісін Наурызбай ауданындағы Алтын Орда көшесінде орналасқан жеке балалар үйінің ғимаратында болған. Оқиға кезінде ғимарат ішінде 35 бала мен қызметкер болған. Абырой болғанда, ешкім зардап шеккен жоқ.

Балалар уақытша сауықтыру санаторийіне орналастырылды. Оларға жылы киім, азық-түлік, жеке гигиена заттары және тәттілер берілді. Қазір барлық тәрбиеленушінің жағдайы жақсы екені айтылды.

«Медициналық қызметкерлер балаларды толық тексерістен өткізді, психологиялық көмек көрсетілді. Балалардың барлығына қашықтан оқу ұйымдастырылды. Қазір олардың ары қарай орналасу мәселесі қарастырылып жатыр», – делінген Комитет хабарламасында.

Оқиға орнында жедел штаб құрылып, оған қалалық әкімдік өкілдері, кәмелетке толмағандар ісі жөніндегі комиссия хатшысы, қоғамдық кеңес пен үкіметтік емес ұйымдардың өкілдері, сондай-ақ қорғаншылық органдары мен психологиялық қолдау орталықтарының мамандары кірді.

Белгілі болғандай, бұл елімізге танымал Әмина апаның «Перзент» балалар үйі. Қазір тиісті қызметтер өрттің себептерін анықтап жатыр.