Бес елдің президенттері Астанаға не үшін келді?

Бүгін Астанада Қытай мен Орталық Азия елдерінің басшылары бас қосып, екінші «Орталық Азия – Қытай» саммитіне қатысады. Астана төріне Қытай, Қырғызстан, Өзбекстан, Тәжікстан, Түрікменстан және Қазақстан президенттері жиналды. 

Саммиттің басты мақсаты – Орталық Азия елдері мен Қытай арасындағы стратегиялық әріптестікті күшейту. Күн тәртібіне сауда-экономика, көлік және логистика, энергетика, қауіпсіздік, сондай-ақ мәдени-гуманитарлық байланыстарды дамыту бағыттары қойылды.

Саммитке байланысты Астанада қауіпсіздік шаралары күшейтілді. Мәңгілік Ел даңғылы мен әуежайға апаратын жолдар уақытша жабылды.

16 маусымда Қытай Халық Республикасының Төрағасы Си Цзиньпин ресми сапармен Астанаға келіп, Мемлекет басшысы Қасым-Жомарт Тоқаевпен кездесті. Бүгін ол өзге орталық азиялық елдердің көшбасшыларымен жеке кездесулер өткізіп жатыр.

Бұл – «Орталық Азия – Қытай» форматы аясында Қытайдан тыс жерде алғаш рет өтіп отырған саммит. 2023 жылы алғашқы кездесу Сиань қаласында өткен болатын. Енді мұндай кездесулер екі жылда бір рет өтіп тұратын болады.