Алматының Ақжар шағынауданында 36 шақырым жолға асфальт төселді

Алматының Наурызбай ауданына қарасты Ақжар шағынауданында ауқымды жол құрылысы жүріп жатыр. Бұл – аудандағы көлік инфрақұрылымын жаңғыртуға бағытталған ең ірі жобалардың бірі. Наурызбай ауданының әкімдігі мен Өңірлік коммуникациялар қызметі ұйымдастырған баспасөз туры барысында журналистер атқарылып жатқан жұмыстардың барысымен танысып, жылдам дамып келе жатқан шағынауданда жол инфрақұрылымының қалай жаңарып жатқанына куә болды.

Жоба аясында жалпы ұзындығы 45 шақырымнан асатын 89 көшеге заманауи автомобиль жолы салынып жатыр. Жол инфрақұрылымын дамыту басқармасының тапсырысымен құрылыс жұмыстарын мердігер «BCS Construction» ЖШС жүргізіп келеді.

Құрылыс бірнеше кезең бойынша жүзеге асырылып, су құбыры мен кәріз желілерін тарту жұмыстарымен өзара үйлестірілген. Мұндай тәсіл инженерлік коммуникациялар жүргізілгеннен кейін жаңадан төселген жолды қайта қазуға жол бермейді. Соның арқасында құрылыс сапасын сақтап, бюджет қаражатын тиімді жұмсауға және тұрғындарға келетін қолайсыздықты азайтуға мүмкіндік туады.

Баспасөз туры кезінде журналистер жол құрылысы жүріп жатқан бірнеше учаскені аралап, орындалған жұмыстармен танысты. Қазіргі таңда Ақжар шағынауданында шамамен 36 шақырым жолға асфальт төселген. Бұл жалпы жоба көлемінің 80 пайызға жуығын құрайды.

Наурызбай ауданының әкімі Нәзира Тоғызбаева аталған жұмыс Ақжар шағынауданының инженерлік және көлік инфрақұрылымын кешенді дамытуға бағытталған ауқымды жобаның жалғасы екенін айтты.

«Мұнда екі жыл бойы су құбыры мен кәріз жүйесінің құрылысы жүргізілді. Инженерлік желілерді тарту жұмыстары аяқталғаннан кейін жол салуға кірістік. Жаңа жолдардың жалпы ұзындығы 45,3 шақырым болады және 89 көшені қамтиды. Бұл – ауданымызда қолға алынған ең ірі инфрақұрылымдық жобалардың бірі», – деді Нәзира Тоғызбаева.

Аудан әкімінің сөзінше, бүгінге дейін жоспарланған жұмыстың басым бөлігі орындалған. Бұған дейін асфальт жамылғысы болмаған ондаған көшеде жол құрылысы толық аяқталды.

«Қазір 36 шақырым жол салынып бітті. Бұрын-соңды асфальт төселмеген 74 көшеде жұмыс толық аяқталды. 2026 жылдың қазан айына дейін қалған жолдарды салып, шағынаудан тұрғындарын заман талабына сай толыққанды жол желісімен қамтамасыз етуді жоспарлап отырмыз», – деп атап өтті аудан әкімі.

Жаңа жолдардың құрылысымен қатар, Наурызбай ауданындағы қолданыстағы көше-жол желісіне орташа және ағымдағы жөндеу жұмыстары да жүргізіліп жатыр. Бұл жұмыстар жол жабындысының сапасын жақсартып қана қоймай, көлік қозғалысының қауіпсіздігін арттыруға және жауын-шашын кезінде су жиналатын учаскелердің мәселесін шешуге бағытталған.

«Орташа жөндеу аясында жалпы ұзындығы 10,4 шақырым болатын 11 көшеде жұмыс жүріп жатыр. Қазіргі кезде Жандосов көшесінің Медеубеков көшесінен Дәулеткерей көшесіне дейінгі аралығы кеңейтілуде. Сонымен қатар ағымдағы жөндеу шеңберінде екі көше жөнделді. Бақылау және жаңбыр суын қабылдайтын құдықтардың қақпақтары ауыстырылып, нөсер кәрізі жүйесінің элементтері қалпына келтірілді. Сондай-ақ жол жамылғысының деңгейіне өздігінен бейімделетін люктер орнатылды», – деді Нәзира Тоғызбаева.

Инженерлік коммуникациялар толық салынып біткен учаскелерде мердігер ұйым жолдың негізін дайындап, асфальтбетон жамылғысын төсеу жұмыстарын жалғастырып жатыр. Құрылыс барысында жол төсемінің беріктігіне, су бұру жүйесінің дұрыс жұмыс істеуіне және көлік қозғалысына қолайлы жағдай жасауға ерекше назар аударылған.

Жобаның кезең-кезеңімен жүзеге асырылуы шағынаудандағы құрылыс жұмыстарын бірізге түсіруге мүмкіндік берді. Алдымен су құбыры мен кәріз желілері тартылып, содан кейін ғана жолдың негізі әзірленіп, асфальт төселуде. Бұл болашақта инженерлік желілерге байланысты жол жамылғысын қайта бұзудың алдын алуға тиіс.

Жоспарға сәйкес, 2026 жылдың қазан айына дейін Ақжар шағынауданындағы көшелерге асфальтбетон жамылғысының жоғарғы қабатын төсеу жұмыстары аяқталмақ. Жоба толық іске асқаннан кейін шағынауданның көлік қолжетімділігі артып, тұрғындардың күнделікті жүріп-тұруы жеңілдейді. Сонымен бірге қоғамдық көліктің қозғалысына, жедел жәрдем мен өрт сөндіру қызметтерінің кедергісіз қатынауына қолайлы жағдай жасалады.

Ауқымды жоба Ақжар шағынауданындағы жол мәселесін жүйелі түрде шешіп, қалалық ортаның жайлылығы мен қауіпсіздігін едәуір жақсартуға мүмкіндік береді.