Алматылықтар назарына: Канье Уэсттің концерті кезінде Орталық стадионға кіру сызбасы жарияланды

Алматы қаласында өтетін Канье Уэсттің концертіне орай Орталық стадионға көрермендерді өткізу сызбасы ұсынылды. Кептеліс пен абыр-сабырды болдырмау үшін ұйымдастырушылар билетте көрсетілген секторды алдын ала тексеріп, тиісті қақпаға бағыт алуды сұрайды.

Көрермендерді өткізу билет санаты мен орналасқан секторына қарай жүзеге асырылады:

• Сәтбаев көшесі жағындағы №3 кіреберіс: BRONZE санатындағы билет иелері мен 1–7, 10–13, 30–60 секторларына арналған.

• Байтұрсынов көшесі жағындағы №1, №2 және №4 қақпалар: GOLD, SILVER санаттары, барлық ложалар мен 8–9, 14–28 секторларының көрермендерін қабылдайды.

• Абай даңғылы жағындағы №5 және №6 қақпалар: Байтұрсынов көшесіндегі кіреберіс сияқты GOLD, SILVER санаттарына, ложаларға және 8–9, 14–28 секторларына арналған.

Көрермендерді стадион аумағына кіргізу сағат 16:00-де басталады. Шектеулер мен жол жабылуын ескере отырып, стадионға ертерек келген абзал. Қате қақпа арқылы кіру өз орныңызды табуды қиындатып, артық уақыт алуы мүмкін. Сондай-ақ шара барысында қауіпсіздік талаптарын сақтап, ұйымдастырушылардың нұсқауларына бағыну сұралады.