Алматылық блогер аутизмі бар балаларды өлтіруге шақырған

Алматы полициясы әлеуметтік желіде ерекше балаларға қатысты қатыгездікке шақырған пікір жарияланғаннан кейін қылмыстық іс қозғады. Бұл туралы қалалық полиция департаменті хабарлады.

Мәселе блогер Райхан Жұмамұратованың жазбасына қатысты. Ол 23 тамыз күні Алматыда болған қайғылы оқиға жөніндегі жазбаның астына «аутизмі бар балаларды өлтіруге» шақырған мазмұнда пікір қалдырған. Сол күні 13 жастағы жасөспірімнің әрекетінен 2 жасар бала зардап шеккені хабарланған болатын.

Ұлттық «Autism Kazakhstan» ассоциациясына көптеген ата-аналардан шағым түсіп, ұйым Бас прокуратура мен Ішкі істер министрлігіне ресми өтініш жолдаған.

Полиция күдіктінің жеке басы анықталғанын мәлімдеді. «Бұл факті бойынша қылмыстық іс қозғалды. Заң аясында шаралар қабылданады. Естеріңізге саламыз, қорлау, әлеуметтік араздықты қоздыру, қатігездік пен зорлық-зомбылықты насихаттайтын материалдар үшін қылмыстық та, әкімшілік те жауапкершілік қарастырылған», – делінген полиция хабарламасында.