Алматыдан Шымкентке ұшқан ұшақ Таразға мәжбүрлі түрде қонды

SCAT әуе компаниясының Алматыдан Шымкентке бағыт алған ұшағы амалсыздан Тараз әуежайына қонды. Бұл ақпаратты әуе компаниясының баспасөз қызметі растады.

Бұған дейін әлеуметтік желілерде қатты турбулентті аймаққа тап болған ұшақ бортынан түсірілген бейне тараған еді. Жарияланым авторының айтуынша, әуе кемесі шамамен 15 минут бойы қатты шайқалған. Осыдан кейін экипаж бағытты өзгертіп, ұшақты Таразға қондыру туралы шешім қабылдаған.

Әуе компаниясының мәліметінше, Шымкент әуежайына қону кезінде ауа райы күрт нашарлаған. Желдің екпіні секундына 24 метрге дейін жетіп, найзағай ойнап, нөсер жаңбыр басталған.

«Алматы – Шымкент рейсінің экипажы қосалқы әуежай ретінде Таразға қону туралы шешім қабылдады. Ауа райы жақсарғаннан кейін ұшақ рейсті жалғастырды», – делінген компания хабарламасында.

Ұшақ Тараз әуежайында шамамен бір жарым сағат болған. Кейін рейс жалғасып, әуе кемесі Шымкент әуежайына штаттық режимде қонған. Кейбір жолаушылар сапарды жалғастырудан бас тартқан.