«Алматыдан шыққан көліктер жоғалып жатыр»: Полиция тасымалдау қызметін пайдаланатындарға ескерту жасады

Қазақстанда логистикалық платформалар арқылы автокөлік пен жүк тасымалдауға байланысты алаяқтық деректері көбейіп жатыр. Бұл туралы Қазақстанның Ішкі істер министрлігі хабарлады.

Ведомствоның мәліметінше, 7 маусымда Алматы тұрғыны полицияға қымбат автокөлігінің ұрланғаны туралы арызданған. Белгісіз адамдар алдау жолымен 60 млн теңге тұратын көлікті иемденіп кеткен. Полицейлер ұрланған автокөлікті тауып, иесіне қайтарды. Қылмысқа қатысы бар деген күдікпен үш адам ұсталды.

Полицияның түсіндіруінше, алаяқтар Della және Fa-Fa.kz секілді жүк тасымалдаушыларды іздеуге арналған сервистерді пайдаланады. Көбіне Алматы қаласы мен Алматы облысынан еліміздің өзге өңірлеріне көлік немесе жүк жеткізу туралы хабарландырулар жарияланады. Осыдан кейін күдіктілер WhatsApp арқылы тапсырыс берушілермен және автовоз жүргізушілерімен байланысқа шығып, біріне тасымалдаушы, екіншісіне тапсырыс беруші ретінде танысады.

Екі тараптың сеніміне кіргеннен кейін алаяқтар тасымал шарттарын келісіп, көлік Алматыдан шыққан соң оны басқа көлікке тиеуді ұйымдастырады. Осылайша, автокөлікті немесе жүкті өз қалауынша иемденеді.

ІІМ азаматтарға жүргізушінің жеке басын куәландыратын құжаттарды және көлік құжаттарын мұқият тексеруге, тасымалдаушының телефон нөмірін хабарландырудағы деректермен салыстыруға, бағыт пен жеткізу орнын алдын ала нақтылауға, сондай-ақ интернеттегі пікірлерді зерттеуге кеңес берді. Күдік туындаған жағдайда 102 нөміріне хабарласу немесе криминалдық полиция бөлімшесіне жүгіну ұсынылды.