Әл-Фараби даңғылындағы үш адамның өмірін қиған жол апаты: Прокурор айыпталушыны 10 жылға соттауды сұрады

Алматы қаласында Әл-Фараби даңғылында болған жол-көлік оқиғасына қатысты сот процесі жалғасып жатыр. Іс бойынша мемлекеттік айыптаушы айыпталушыға 10 жыл бас бостандығынан айыру жазасын тағайындауды сұрады.

Прокурордың ұсынысына сәйкес, Александр Пак жазасын қылмыстық-атқару жүйесінің ең төмен қауіпсіздік мекемесінде өтеуі тиіс. Оған алкогольдік мас күйде көлік жүргізіп, екі және одан да көп адамның өліміне әкеп соққан жол ережесін бұзу бойынша айып тағылған.

Айыпталушы өз кінәсін толық мойындап, жауапкершіліктен жалтаруға тырыспайтынын мәлімдеді.

Қайғылы оқиға 21 наурызға қараған түні болған. Тергеу мәліметіне сәйкес, Zeekr көлігі қарсы бағытқа шығып кетіп, Mercedes автокөлігімен соқтығысқан. Апат салдарынан Mercedes жүргізушісі мен екі жолаушы қаза тапты.