Алматыдағы қайғылы жол апаты: Полиция қызметкерлерінің қатысы бар ма?

Алматы қалалық Полиция департаментінің бастығы Айдын Қабдулдинов халықпен есеп беру кездесуінде 21 наурызға қараған түні болған, үш адамның өмірін қиған қайғылы жол апатына қатысты мәлімдеме жасады. Қазіргі уақытта қоғамда үлкен резонанс тудырған бұл іс бойынша бірнеше маңызды жайт анықталып отыр.

Полиция басшысының айтуынша, Zeekr көлігінің жүргізушісі қазір аурухананың жансақтау бөлімінде жатыр. Сондықтан онымен әлі ресми тергеу амалдары жүргізілген жоқ. Дегенмен, күдіктінің жағдайы тұрақталған бойда ол бірнеше бап бойынша жауапқа тартылады.

«Ол жансақтау бөлімінде жатқандықтан, әлі тергеу жүргізілген жоқ. Палатаға ауыстырылған соң, оған қатысты бұлтартпау шарасы – қамауға алу таңдалады. Ауруханаға түскен кезде жүргізушіден қан сараптамасы алынды, бірақ әлі нәтижесі дайын емес», – деді Айдын Қабдулдинов.

Бейресми дереккөздер Zeekr көлігінің басқа көлікпен жарысқанын және бұл оқиғаға жоғары лауазымды полиция қызметкерінің қатысы болуы мүмкін екенін айтуда. Департамент бастығы бұл ақпаратқа қатысты да пікір білдірді.

«Полиция қызметкерлеріне қатысты ПД қызметтік тексеру жүргізіп жатыр. Қызметкерлердің іс-әрекетіне нақты құқықтық баға беріледі. Егер олардың кінәсі анықталса, біз ең қатаң шараларды қолданамыз», – деп сендірді бас полицей.

Алматыдағы бұл жол апаты 21 наурызға қараған түні орын алып, соқтығыс салдарынан үш адам оқиға орнында көз жұмған болатын. Қазіргі уақытта іс «Көлік құралдарын басқаратын адамдардың жол қозғалысы ережелерін бұзуы, абайсызда екі немесе одан да көп адамның өліміне әкеп соғуы» бабы бойынша тергелуде.