Алматыдағы Әл-Фараби даңғылында маусым айында көлік қозғалысына шектеу енгізіледі

Алматы қаласында жерасты газ құбырларын реконструкциялау және жаңғырту жұмыстарының жүргізілуіне орай, маусым айында қаланың үш ауданында көлік қозғалысына уақытша шектеулер енгізіледі. Бұл туралы «QAZAQGAZ AIMAQ» Алматы өндірістік филиалы хабарлады.

Инфрақұрылымды жаңғырту жобасы аясында екі негізгі магистральды қамтитын жұмыстар жүргізіледі:

 Әл-Фараби даңғылы: Луганский көшесінен бастап Каратаев көшесіне дейінгі аралықта (солтүстік жағы) ұзындығы 1154 метр болатын газ құбыры жаңартылады.

 Жароков көшесі: Қарасай батыр көшесінен бастап Мыңбаев көшесіне дейінгі (шығыс жағы) 1861 метрлік учаскеде жөндеу жұмыстары жүзеге асырылады.

Аталған жол учаскелерінде жүргізілетін құрылыс-монтаждау жұмыстарына байланысты көлік қозғалысының схемасы уақытша өзгереді. Осыған орай, Алматы қаласының полиция департаменті мен газ тарату мекемесі көлік иелерін баламалы бағыттарды алдын ала жоспарлауға және жол белгілері мен реттеушілердің нұсқауларын қатаң сақтауға шақырады.

Жөндеу жұмыстарының қаланың газ инфрақұрылымының қауіпсіздігі мен сенімділігін арттыру мақсатында жүргізіліп жатқанын ескертеміз.