Алматыда жойқын жер сілкінісі кезінде паналайтын қалашық құрылды

Алматыда жер сілкінісі кезінде тұрғындарды қауіпсіз жерге көшіруге арналған шатырлы қалашық құрылды, деп мәлімдеді ҚР Төтенше жағдайлар министрі Шыңғыс Әрінов Мәжілісте өткен отырыс барысында. Бұл қалашық қала тұрғындарына төтенше жағдайлар кезінде баспана болмақ.

Министрдің айтуынша, шатырлы қалашық Түрксіб ауданында орналасқан және оның аумағы 173 гектарды құрайды. Бұл аймақ сейсмикалық тұрғыдан қауіпсіз саналып, ешқандай жер асты жарылыстары мен жарықтар жоқ платоға орналастырылған. Сонымен қатар қалашыққа кіруге арналған жолдар, оның ішінде теміржол желілері де бар. Қажет болған жағдайда бұл жерге 50 мың адамды орналастыруға болады. 

"Бұл аймақтың бірегейлігі – оның кеңдігі. Мұнда 50 мың адамға дейін орналастыру мүмкіндігі бар. Болашақта біз бұл базаны 1 миллион адамға дейін кеңейтуді жоспарлап отырмыз", – деп атап өтті министр Шыңғыс Әрінов.

Министр алдағы уақытта тек Алматыда ғана емес, әр облыс орталығының маңында осындай қауіпсіз орындар құру жоспарда бар екенін айтты. Бұл базалар төтенше жағдайлар кезінде халықты қауіпсіз аймаққа көшіруге және қажетті заттармен қамтамасыз етуге арналған.

"Әрбір зардап шеккен адамға термокиім, аяқ киім, және қорғаныс құралдары беріледі деп жоспарлап отырмыз. Әр 10 адамға медициналық көмек көрсету жиынтығы дайындалады. Сонымен қатар алғашқы медициналық көмек көрсету үшін арнайы дәрігерлер болады. Қалашықта палаткалар, ұйықтайтын қаптар, және үш күнге жететін тамақпен қамтамасыз ету жоспарланған", – деп түсіндірді министр.