Алматыда жер сілкінісі туралы ескерту жүйесін жетілдіруге 3-5 жыл қажет

Алматыда жер сілкінісі туралы жаппай хабарлау жүйесін толыққанды жетілдіру үшін бірнеше жыл қажет. Бұл туралы қалалық Төтенше жағдайлар департаментінің азаматтық қорғаныс басқармасының басшысы Қуаныш Оспанов Курсивке мәлімдеді.

Жақында алматылықтар 2-3 баллдық екі жер сілкінісін сезінді. 17 ақпанда болған алғашқы дүмпу қаланың кейбір ауданында айтарлықтай байқалған. Алайда Mass Alert ескерту жүйесі іске қосылмаған. Бұған дейін ТЖМ баспасөз қызметі жүйе тек 5 балл және одан жоғары қарқын тіркелген жағдайда ғана автоматты түрде қосылатынын түсіндірген еді. Дегенмен тұрғындар бұған дейін екі баллдық сілкіністе де жүйенің іске қосылғанын еске алады.

Қуаныш Оспановтың айтуынша, жүйе белгілі бір есептеулерге сүйене отырып жұмыс істейді.

– Жүйе өз есептеулері бойынша Алматы қаласында 5 балл және одан жоғары жер сілкінісі болады деп анықтаса, автоматты түрде хабарлау жүйесін іске қосады. Ол үнемі калибрленіп, түзетіліп отырады. Халықаралық тәжірибеге қарасақ, АҚШ пен Жапонияда мұндай жүйелерді нақты әрі дұрыс жұмыс істеуі үшін 3-5 жыл бойы калибрлеген жағдайлар бар. Бізде бұл жүйе әлі жас, – деді ол.

Департамент өкілі жүйені жетілдіру үшін уақыт қажет екенін атап өтті.