Алматыда жалпықалалық бос жұмыс орындары жәрмеңкесі өтеді

Алматыда 24 шілде күні жалпықалалық бос жұмыс орындары жәрмеңкесі өтеді. Іс-шара сағат 15:00-де Almaty Arena кешенінде басталады.

Жәрмеңкеге экономиканың түрлі саласынан 100-ден астам жұмыс беруші қатысады. Олар 400-ге жуық бос қызмет орны бойынша 2 мыңнан астам жұмыс орнын ұсынады.

Қатысушылар жұмыс берушілермен тікелей кездесіп, еңбек жағдайы, жалақы мөлшері, әлеуметтік кепілдіктер мен кәсіби өсу мүмкіндіктері туралы ақпарат ала алады. Бірнеше мекеменің өкілімен сол жерде сұхбаттасуға мүмкіндік беріледі.

Жәрмеңке барысында келушілерге жұмыспен қамтуға арналған мемлекеттік қолдау шаралары, кәсіптік оқыту бағдарламалары және еңбек нарығында сұранысқа ие мамандықтар жөнінде кеңес беріледі.

Іс-шараны Алматы қаласының Еңбек мобильділігі орталығы қала әкімдігі мен Жұмыспен қамту және әлеуметтік бағдарламалар басқармасының қолдауымен ұйымдастырады.

Жәрмеңке Алматы қаласы Алатау ауданындағы Нұркент шағын ауданы, 7 мекенжайында орналасқан Almaty Arena кешенінде өтеді. Қатысу тегін. Ұйымдастырушылар жұмыс іздеушілерге өзімен бірге түйіндеме алып келуге кеңес берді.