Алматыда «вафельді» жол таңбасын бұзған жүргізушілерге айыппұл салына бастайды

Алматыда алдағы уақытта «вафельді» жол таңбасын бұзу әкімшілік жауапкершілікке әкелмек. Қазір полицейлер тек түсіндіру және профилактикалық жұмыстар жүргізіп жатыр, деп хабарлады қалалық Полиция департаменті.

Алғашқы «вафельді» жол таңбалар Алматыда 2019 жылы тәжірибе ретінде екі қиылыста салынған еді. Кейін жоба уақытша тоқтағанымен, 2025 жылы қайта жанданып, бүгінде қаладағы 10-нан астам көше қиылысында осындай таңбалар бар.

Полицияның мәліметінше, 2019 жылы жол қозғалысы ережелерінде бұл таңбаға қатысты нақты норма болмаған. Қазір ол ресми түрде бекітіліп, «вафельді» таңбамен белгіленген, бірақ бос емес қиылыстарға шығу құқықбұзушылық ретінде қаралады.

"Қазір жол қозғалысын автоматтандырылған бақылау жүйелерімен біріктіру жұмыстары жүріп жатыр. Бұл болашақта осындай құқық бұзушылықтарды тіркеп, тиісті шара қолдануға мүмкіндік береді. Әзірге мақсатымыз — жүргізушілерге түсіндіру және алдын алу жұмыстарын жүргізу. «Вафельді» таңбасы бар қиылыстарда көліктердің қозғалысын бөгемеуге дағдыландыру қажет. Мұның бәрі жол қозғалысының қауіпсіздігін арттыру үшін жасалып жатыр", — деді Алматы қалалық Полиция департаментінің ресми өкілі Салтанат Әзірбек.

Айта кетейік, «вафельді» жол таңбасы – қиылыста сары тор сызықтармен белгіленген аймақ. Ол жүргізушілердің бос емес қиылыстарда тұрып қалмауын және көлік кептелісін болдырмауды көздейді.