Алматыда танымал белсенді Санжар Боқаев ұсталды

Бұл туралы Бас прокуратура ресми мәлімдеді.

Ведомствоның мәліметінше, ол жалған ақпарат таратып, қоғамда теріс пікір қалыптастыру мақсатында әлеуметтік желілерде видеоматериалдар жариялаған деген күдікке ілінген. Аталған видеоларда белгісіз адамдардың қоғамдық саябақ аумағында ағаштарды заңсыз кесуі және құрылыс нысандарынан мүлік ұрлауы көрсетілген.

Тергеу деректеріне сәйкес, Боқаев осы әрекеттерді өзі ұйымдастырып, қаржыландырған болуы мүмкін. Ол үшін табысы төмен азаматтарды тартып, оларға ақша ұсынып, ағаш кесу мен ұрлық жасауды тапсырған деген болжам бар.

Сонымен қатар ол аса ірі көлемде алаяқтық жасау арқылы қаржы жымқырды деген күдікке де ілінген.

Бас прокуратура басқа мәліметтер Қылмыстық-процестік кодекстің 201-бабына сәйкес жария етілмейтінін атап өтті.

Айта кетейік, бұған дейін Санжар Боқаев әлеуметтік желіде видео жариялап, АҚШ-қа көшкенін және қоғамдық белсенділіктен көңілі қалғанын айтқан болатын.