Алматыда суррогат ана тапсырыс берушілерден 7,5 млн теңге талап етіп отыр

Алматыда суррогат ана болып қызмет көрсеткен 27 жастағы әйел тапсырыс берушілер уәде еткен 7,5 млн теңгені ала алмай жүргенін айтып, құқық қорғау органдарына жүгінді. Бұл туралы KTK.kz хабарлады.

Кристина Гаврилюк есімді әйел қытайлық ерлі-зайыптыға бала көтеріп берген. Келісім бойынша оған 7,5 млн теңге көлемінде гонорар төленуі тиіс болған. Эмбрион Алматыдағы клиникалардың бірінде салынған.

Жүктілік кезінде биологиялық ата-аналар әйелге тұрақты түрде қаржылай көмек көрсетіп, ай сайын шамамен 200 мың теңге төлеп отырған. Алайда жүктілік барысында асқынулар болып, бала жеті айында дүниеге келген.

Суррогат ананың айтуынша, осыдан кейін тапсырыс берушілер байланысқа шықпай, кейін баладан мүлде бас тартқан. Дәрігерлердің тексеруінен кейін сәбидің жағдайы тұрақты екені анықталған. ДНҚ-сараптамасы да баланың сол ерлі-зайыптыға тиесілі екенін растаған.

Кристина Гаврилюк жаңа туған сәбиді өзіне қалдырудан бас тартып, жазбаша түрде өтініш берген. Қазіргі уақытта нәресте сәбилер үйіне орналастырылып, мемлекет қамқорлығына алынған.

Әйел бұл жағдайға байланысты полицияға арызданғанымен, құқық қорғау органдары қылмыстық іс қозғаудан бас тартқан.

Алматы қалалық полиция департаментінің ресми өкілі Салтанат Әзірбектің айтуынша, бұл мәселеде қылмыстық немесе әкімшілік құқықбұзушылық белгілері анықталмаған. Сондықтан дауды азаматтық тәртіппен сот арқылы шешу ұсынылған.