Алматыда 52 адам уланды: істің мән-жайы анықталды

Алматыда пойыз ішінде 52 адамның улануына байланысты қылмыстық іс қозғалды, деп хабарлады Көліктегі полиция департаментінің баспасөз қызметі. Оқиға “Алматы-2” теміржол вокзалында, кинотүсірілім үшін арнайы берілген пойызда болған. Зардап шеккендердің арасында 10 бала бар, олардың екеуі жансақтау бөлімінде жатыр.

Пойыздағы жағдайды көрген бір куәгердің айтуынша, вагонда өте суық болған, сондықтан түсірілімге қатысушылар газ жағатын шағын қыздырғышты қолдана бастаған. Алайда желдету болмағандықтан, вагон ішінде улы газ жиналып, адамдардың жағдайы күрт нашарлаған. Оның сөзінше, сол сәтте вагонда айқай-шу басталып, бірнеше әйел есінен танып қалған. Жолаушыларды дереу басқа вагонға көшіру туралы шешім қабылданған.

«ҚР Қылмыстық кодексінің 156-бабы — “Еңбекті қорғау қағидаларын бұзу” бойынша қылмыстық іс тіркелді. Қажетті тергеу әрекеттері жүргізіліп жатыр, оқиғаның барлық мән-жайы анықталғаннан кейін процессуалдық шешім қабылданады», — делінген хабарламада.

Аталған бап бойынша айыппұл немесе қамауға алу түріндегі жаза қарастырылған.