Алматыда оқушы өзіне қол жұмсауға талпынған: қылмыстық іс қозғалды

Алматыдағы жекеменшік QSI мектебінде оқитын оқушы өзіне қол жұмсауға әрекет жасаған. Қыздың әкесінің айтуынша, мектеп басшылығы ұзақ уақыт бойы буллинг мәселесіне назар аудармаған. Аталған дерек бойынша полиция тергеу бастады.

Оқиға туралы баланың әкесі, кәсіпкер Қанат Әміркин хабарлады. Оның айтуынша, қызы шамамен бір жыл бойы сыныптастарының қысымына ұшыраған. Әкесі мектеп әкімшілігіне бірнеше рет жүгінгенімен, нақты шаралар қабылданбағанын айтады. Қайғылы жағдай болған күні бала мектепке барудан қатты қорыққан.

Қазіргі таңда оқушы жансақтау бөлімінде жатыр. Қанат Әміркин оқиғаның Алматыдағы америкалық жекеменшік QSI мектебінде болғанын атап өтті. Оның мәліметінше, бұл оқу орнындағы жылдық оқу ақысы шамамен 25 мың АҚШ долларын құрайды.

Жағдайды Балалардың құқықтарын қорғау комитеті тексеріп жатыр. Оқиға бойынша полиция қылмыстық іс қозғады.

Балалардың құқықтарын қорғау комитетінде хабарлағандай, оқиға орнына психологиялық қолдау орталығының мобильді тобы мен білім басқармасының өкілдері барған. Балаға жеке психологиялық сүйемелдеу ұйымдастырылатыны айтылды.

Сонымен қатар мектеп әкімшілігіне педагогикалық ұжыммен профилактикалық жұмыс жүргізу, балалар арасындағы суицидтік мінез-құлықтың ерте белгілерін анықтау және мұндай жағдайлардың алдын алу жөнінде ұсыныс берілген. Ведомство бұл жағдай уәкілетті органдардың тұрақты бақылауында екенін атап өтті.

Алматы қалалық полиция департаменті Қылмыстық кодекстің 105-бабы («Өзін-өзі өлтіруге жеткізу») бойынша қылмыстық іс қозғалғанын мәлімдеді. Тергеу барысында оқиғаның барлық мән-жайы жан-жақты әрі толық анықталмақ.

QSI мектебінің өкілдері бұл оқиғаға қатысты пікір білдіруден бас тартты.