Алматыда нөсерден кейін жол опырылып, 13 көлік зақымданды: шығынды мердігер өтейді

Алматы қаласының Әуезов ауданындағы Аманжол көшесінде 16 қыркүйек күні қатты жауған жаңбырдан кейін бірнеше көлік жол шұңқырына түсіп кетті. Оқиға куәгерлері түсірген бейнежазба әлеуметтік желіде жарияланып, онда шамамен жиырмадан астам көліктің зақымданғаны айтылды.

Алайда Алматы әкімі кеңесшісі Ильзат Ақчуриннің мәліметінше, барлығы 13 көлік зардап шеккен. Қазіргі таңда Аманжол көшесі уақытша жабылып, 17 қыркүйек күні таңертең көліктерді эвакуациялау жұмыстары басталды.

"Мердігер компания зақымданған көліктердің иелеріне келтірілген шығынды толық өтейді. Бұл мәселе Алматы қаласы әкімдігінің бақылауында тұр", – деді Ильзат Ақчурин.

Әуезов ауданы әкімдігі таратқан ақпаратқа сәйкес, аталған көшеде бұған дейін «Спецстрой Групп ЛТД» ЖШС сумен қамту және канализация инженерлік желілерін жүргізген. Жұмыстар толық аяқталғанымен, асфальт төсеу кейінге қалдырылған. Себебі бұл аумақта газ құбыры салу жоспарланған болатын.

Сонымен бірге мамандардың айтуынша, нөсер кезінде аудандағы арық жүйесімен аққан барлық су осы көшеге келіп құйылады. Инженерлік желілердің 6 метр тереңдікте жүргізілуі де топырақтың беріктігін әлсіреткен. Осы факторлар мен қатты жауын салдарынан жер ойылып, жол жабындысының тұтастығы бұзылған.