Алматыда Наурыз мерекесі жаңа буынға сай технологиялық форматта ұйымдастырылады

Алматы қаласында биыл Наурыз мерекесі жаңартылған форматта ұйымдастырылмақ. Мерекелік іс-шаралар дәстүрлі мәдени құндылықтарды заманауи технологиялармен ұштастыру арқылы өтеді.

Ұйымдастырушылардың мәліметінше, биылғы тұжырымдама «Наурыз – жаңару мерекесі» идеясына негізделген. Осыған орай қала аумағында біртұтас мерекелік кеңістік қалыптастырылып, көркемдік және цифрлық шешімдерге басымдық берілген.

Орталық алаңдарда тақырыптық инсталляциялар орнатылып, киіз үйлер жаңа форматта ұсынылады. Әрбір киіз үй мазмұндық тұрғыдан жеке мәдени кеңістік ретінде ұйымдастырылып, ұлттық мұраның түрлі қырларын таныстыруға бағытталған.

Сонымен қатар, мереке аясында заманауи технологияларға негізделген бірқатар жобалар іске асырылады. Атап айтқанда, жасанды интеллект элементтері қолданылған интерактивті алаңдар, «робо-киіз үй», сондай-ақ толық иммерсивті «360 градус» цифрлық кеңістіктер келушілер назарына ұсынылады.

Қаланың жаяу жүргіншілер аймақтарында LED-инсталляциялар мен интерактивті нысандар орнатылып, келушілердің қатысуымен жұмыс істейтін динамикалық орта қалыптастырылады. Сонымен қатар, арнайы цифрлық туннельдер арқылы тарихи және заманауи кезеңдерді байланыстыратын визуалды шешімдер ұсынылады.

Мерекелік бағдарлама мәдени іс-шаралармен толықтырылады. Алаңдарда концерттік қойылымдар ұйымдастырылып, ұлттық музыка мен өнер заманауи форматта көрсетіледі. Халықаралық деңгейде қолөнершілердің көрмесі өткізіліп, дәстүрлі өнерді жаңаша ұсыну мүмкіндігі қарастырылған.

Жалпы, Алматы қаласында Наурыз мерекесі аясында 21–23 наурыз күндері 200-ден астам іс-шара өткізу жоспарланған. Негізгі мерекелік алаңдар қала орталығында орналасқан қоғамдық кеңістіктерде ұйымдастырылады.