Алматыда монорельсті көлік жүйесі енгізілуі мүмкін

Алматыда жоғары жылдамдықтағы монорельсті SkyTrain жүйесін енгізу жобасы кезең-кезеңімен жүзеге асырылып жатыр. 

Бұл туралы Centralmedia24 басылымының сауалына жауап ретінде Алматы қаласының жол инфрақұрылымын дамыту басқармасы хабарлады.

Қала билігі жобаны жеделдетіп, оның техникалық-экономикалық негіздемесін әзірлеуге кірісуді жоспарлап отыр.

2026 жылдың наурыз айында Президент Алматы әкімі Дархан Сатыбалдымен кездесуде SkyTrain жобасын іске асыру жұмыстарын жандандыруды тапсырды. Осыдан кейін қалада жаңа қоғамдық көлік жүйесін дамыту мәселесі қайта күн тәртібіне шықты. Басқарма мәліметінше, SkyTrain – заманауи жоғары жылдамдықты монорельсті көлік жүйесі. Оның ерекшелігі – пойыздар бір ғана тірек рельсі бойымен қозғалады, ал LRT екі рельсті инфрақұрылымға негізделеді.

Ведомствоның айтуынша, жоба көлік ағындарын қайта бөлуге, кептелісті азайтуға, қоғамдық көліктің өткізу қабілетін арттыруға және экологиялық жағдайды жақсартуға бағытталған. Қазіргі уақытта жоба бастапқы кезеңде тұр. Алдымен техникалық-экономикалық негіздеме әзірленіп, содан кейін ғана маршрут, құны, қаржыландыру көздері және мерзімі нақтыланады.

SkyTrain жобасы Алматының 2030 жылға дейінгі көлік инфрақұрылымын дамыту жоспарына енгізілген.

Айта кетейік, бұған дейін Алматыда LRT жобасының да ТЭН-і аяқталып, оның мемлекеттік сараптама қорытындысы 2026 жылдың шілдесінде күтілетіні хабарланған.