Алматыда мамыр айының соңына дейін төтенше жағдайды жедел хабарлау жүйесі енгізіледі

Биылғы мамыр айының соңына дейін Алматы әкімдігі мобильді құрылғылар арқылы төтенше жағдайлар туралы жедел хабарлау жүйесін пилоттық түрде енгізуді жоспарлап отыр. Бұл туралы сейсенбі күні үкімет отырысында Алматы әкімі Ерболат Досаев мәлім етті.

"Алматы әкімдігі пилоттық режимде цифрлық даму, инновациялар және аэроғарыш өнеркәсібі министрлігі және төтенше жағдайлар министрлігімен бірлесіп, қала тұрғындарын төтенше жағдайлар туралы жедел хабардар ету мақсатында биыл мамыр айының соңына дейін 475 млн теңге бөлінген Cell Broadcast технологиясын пайдалана отырып, "Mass Alert" қағидаты бойынша халықты жедел құлақтандыру жүйесін енгізуді жоспарлап отыр", - деді Досаев үкімет отырысында.

Әкім дәстүрлі SMS-тен айырмашылығы, Cell Broadcast технологиясы желіге қосымша жүктеме жасамайтынын және базалық станцияның антенналарының қамту аймағында орналасқан барлық абоненттерге жедел және жаппай таратуды, хабарландырудың уақыты мен жиілігін қамтамасыз етуге мүмкіндік беретінін атап өтті.

Бұған дейін Алматы қалалық Төтенше жағдайлар департаменті қаңтардың 22-нен 23-не қараған түні болған бес балдық жер сілкінісі кезінде байланыс операторларының хабарламаларды өңдеуге үлгермеуіне байланысты тұрғындарға SMS хабарламалар дер кезінде жетпегенін атап өткен болатын.