Алматыда курьердің арқасында жасөспірімге заңсыз вейп жеткізу фактісі әшкереленді

Алматы қаласында жеткізу қызметі өкілінің қырағылығы арқасында заңсыз затты сату әрекеті әшкереленді. Тапсырысты мекенжайға жеткізген курьер сәлемдемені алуға шыққан тұлғаның мектеп жасындағы бала екенін көріп, күдіктенген.

Жеткізуші күмәнді қорапты жасөспірімнің қолына бермей, оқиға орнынан бірден құқық қорғау органдарына қоңырау шалған. Мекемеге жеткен тәртіп сақшылары курьердің көзінше сәлемдемені ашқан кезде, ішінен ел аумағында айналымына шектеу қойылған электронды сигареттер мен құрамында никотині бар арнайы сұйықтықтар шықты.

«Қазіргі уақытта бұл іске қатысы бар жасөспірім мен тапсырысты жіберуші азамат полиция бөліміне жеткізілді. Оқиғаның барлық мән-жайын анықтау мақсатында тиісті тексеру амалдары жүргізілуде», – деп мәлімдеді Алматы қалалық Полиция департаментінен.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от Алматы қаласының ПД | ДП г.Алматы (@almaty.police)

Курьердің сөзінше, мұндай тапсырыстарға назар аударуға әріптестерінің өзара тәжірибе алмасуы көмектескен. Бүгінде жеткізушілер арнайы чаттар арқылы заңсыз жүктерді тасымалдаудың айла-шарғылары туралы ақпаратпен бөлісіп, күмәнді сәлемдемелер түскенде сақтық танытуды әдетке айналдырған.

Айта кетейік, ел заңнамасына сәйкес Қазақстанда вейптерді, электронды сигареттерді және оларға арналған сұйықтықтарды сатуға, өндіруге, сондай-ақ елге кіргізуге толықтай тыйым салынған. Осыған дейін Ұлттық қауіпсіздік комитеті өкілдері де шекарада құны 500 миллион теңгеге жуықтайтын заңсыз вейп өнімдерін тасымалдау әрекетінің жолын кескен еді.