Алматыда курьер зейнеткерді алаяқтардан құтқарып, полицияның марапатына ие болды

Алматы қаласының полиция қызметкерлері егде жастағы әйелді алаяқтардың арбауынан аман алып қалған курьерге алғыс білдірді. Қырағы азаматтың арқасында зейнеткер өзінің жиған-терген қаражатын сақтап қалды, деп хабарлайды Polisia.kz.

Жеткізу қызметінің өкілі Нартай Есімханов тапсырысты қабылдау барысында кейуананың оғаш мінез-құлқына назар аударған. Әже қатты қобалжып, қораптың ішінде не бары туралы сұрақтарға анық жауап бере алмаған. Қарияның алаяқтардың апанына түскенін сезген курьер уақыт созбай бұл туралы тәртіп сақшыларына хабар берді.

Оқиға орнына жедел жеткен полиция қызметкерлері қылмыскерлердің зейнеткерді алдап, курьер арқылы 3 000 АҚШ доллары салынған түйіншекті беріп жіберуге көндіргенін анықтады. Курьердің жедел әрекетінің арқасында қылмыстың жолы кесіліп, қаржы иесіне қайтарылды.

«Қарияның көзінен қорқынышты көргенде, жүрегім сыздап кетті. Өз анам көз алдыма келіп, «оның орнында менің де анам болуы мүмкін еді ғой» деген ой келді. Содан кейін бірден полицияға хабарласуды жөн көрдім», – дейді Нартай Есімханов.

Азаматтық белсенділік танытқаны үшін Алматы қалалық Полиция департаментінің бастығы Айдын Қабдулдинов Нартай Есімхановқа арнайы Алғыс хат пен естелік сыйлық тапсырды.

Полиция өкілдері мемлекеттік орган немесе банк қызметкерлері ешқашан курьер арқылы ақша беруді талап етпейтінін ескертіп, осындай күдікті жағдайларда бірден «102» нөміріне хабарласуға шақырады.