Алматыда қоғамдық көліктің жолақысы тағы қымбаттауы мүмкін

Алматыда қоғамдық көлікте жол жүру ақысы 20 теңгеге өсуі мүмкін. Қала әкімдігі тиісті қаулы жобасын «Ашық НҚА» сайтында жария талқыға шығарды.

2023 жылдың 21 тамызында Алматыда жол жүру ақысы қолма-қол ақшасыз төлем үшін 100 теңгеге дейін, қолма-қол төлем үшін 200 теңгеге дейін (80 және 150 теңгеден) көтерілді. Биыл маусым айының соңында Жолаушылар тасымалы кәсіпорындары қауымдастығы қолданыстағы тарифтің тиімсіз екенін мәлімдеді. Қалалық мобилділік басқармасы қоғамдық көлікте жол жүру үшін орташа тариф 310 теңге, ал кейбір маршрутта 400 теңгеге жететінін атап өтті. Тиісінше, субсидия көлемі де артады. 2023 жылы 68,7 млрд теңге субсидия бөлінсе, биыл субсидияның болжамды сомасы 97,3 млрд теңгеге дейін өсті.

"Қала тасымалдаушылары қолданыстағы тариф тасымалдаушылардың автобус сатып алуға, жаңартуға және уақытылы қызмет көрсетуге, сондай-ақ, жүргізушілердің жалақысын көтеруге жұмсаған шығынды өтемейтінін бірнеше рет мәлімдеді. Тасымалдаушыларға және жергілікті бюджетке жүктемені ішінара азайту мақсатында қалалық қатынастарда жолаушылар мен багажды автомобильмен тұрақты тасымалдауға тариф белгілеу туралы қала әкімдігі қаулысының жобасы дайындалды. Жоба жол жүру тарифін 120 теңгеге дейін көтеруді көздейді. Тиісінше, азаматтардың жеңілдетілген санаттары үшін жол жүру құны тарифтің 50 пайызы болады", – деп жазылған басқарма хабарламасында.

Сондай-ақ қоғамдық көлікте жол жүру ақысын қолма-қол ақшамен төлеуді алып тастау көзделген.

"Бұл автобус жүргізушісіне көлік құралын басқаруға және ақша жинауға алаңдамауға мүмкіндік береді", – деп хабарлады қала әкімдігі.