Алматыда кептелісті азайту үшін студенттердің оқу кестесін өзгертпек

Алматыда 600 мыңнан астам студенттің оқу кестесіне өзгеріс енгізу мәселесі қаралып жатыр. Бұл бастама қалалық мәслихат депутаты Қарашаш Жүзеева тарапынан көтерілген еді, деп хабарлады Власть.

Оның ұсынысына сәйкес, студенттердің бір бөлігі сабақтарын таңғы сағат 8:00-де бастаса, екінші бөлігі оқуын 10:00-ден бастайды. Мұндай тәсіл оқу орындарына келетін студенттердің ағымын әртүрлі уақытқа бөліп, жолдағы көлік қозғалысын жеңілдетеді деп күтіледі.

Апта бұрын депутат Жүзеева колледждер мен жоғары оқу орындарындағы сабақ кестесін қайта қарауды ұсынған болатын: кешкі ауысым студенттері үшін – таңғы 7:30-да, ал бірінші ауысымдағылар үшін – 10:00 немесе 11:00-де бастауды ұсынды.

Алматы әкімдігі бұл бастаманы қолдады.

«Бұл шешім 637 мыңнан астам студенттің қозғалысын әртүрлі уақытқа бөлуге және жолдағы жүктемені азайтуға мүмкіндік береді», – деп түсіндірді әкімдік.

Сонымен қатар әкімдік қаладағы көлік кептелісін азайту үшін жекеменшік компаниялардың кеңсе қызметкерлерін қашықтан жұмыс форматына көшіру бастамасын да қолдайтынын хабарлады. Дегенмен түпкілікті шешім әрбір компанияның өз еркінде. Бұған дейін аудан әкімдіктері кәсіпкерлерге 2–6 қыркүйек аралығында қызметкерлердің бір бөлігін қашықтан немесе икемді жұмыс кестесіне көшіруді ұсынған.

Әкімдік қазір өз қызметкерлерінің шамамен 30 пайызын қашықтан жұмыс істеуге көшіру мүмкіндігін қарастырып жатыр.