Алматыда қаржылық қылмыстарға қарсы бағытталған ауқымды «AFM AI Hackathon 2026» инновациялық іс-шарасы өтеді

Қазақстан Республикасы Қаржылық мониторинг агенттігі әл-Фараби атындағы Қазақ ұлттық университетімен бірлесіп, IT-мамандарды, аналитиктерді және жасанды интеллект саласындағы сарапшыларды «AFM AI Hackathon 2026» ауқымды инновациялық байқауына қатысуға шақырады.

Бұл іс-шара мемлекеттік «Заң мен тәртіп» қағидатын іске асыру аясында ұйымдастырылып отыр. Жобаның басты мақсаты – экономикалық және қаржылық қылмыстарға қарсы күреске бағытталған озық цифрлық құралдар мен бағдарламалық шешімдерді әзірлеу.

Байқау 2026 жылғы 24–25 маусым күндері Алматы қаласында, «Farabi Hub» инновациялық орталығының алаңында өтеді.

Бағдарламалық өнімдерді әзірлеу барысында қатысушылар өз білімдері мен дағдыларын келесі үш негізгі бағыт бойынша көрсетеді:

 Digital Shadow – Көлеңкелі интернет кеңістігін мониторингтеу және ашық дереккөздерден (OSINT) ақпарат жинау жүйелерін құру;

 AI Shield – Мемлекеттік және корпоративтік деректер базасын қорғауға, сондай-ақ киберқауіпсіздікті қамтамасыз етуге арналған жасанды интеллект алгоритмдерін әзірлеу;

 AI Media Watch – Әлеуметтік желілер мен медиа кеңістіктегі заңсыз ойын бизнесі мен қаржылық пирамидалардың белгілерін автоматты түрде анықтау құралдарын жасау.

«AFM AI Hackathon 2026» – заманауи технологияларды елдің экономикалық қауіпсіздігін қамтамасыз ету құралына айналдыруға және жас мамандардың стартап идеяларын нақты цифрлық шешімдер деңгейіне дейін дамытуға арналған бірегей кәсіби алаң.

Байқауға қатысу үшін өтінімдерді қабылдау мен тіркеу үрдісі www.qmahackaton.kz ресми веб-сайтында жүргізілуде. Шарт бойынша, әр команданың құрамы 3 адамнан аспауы тиіс.

Ақпарат Алматы қаласы бойынша экономикалық тергеп-тексеру департаментінің баспасөз қызметі ұсынған ресми мәліметтер негізінде дайындалды.