Алматыда буллингке қатысты 400-ден астам шағым түсті: Балаларға қалай көмек көрсетілуде

Алматы қаласында мектеп жасындағы балалар арасындағы қысым мен кибербуллингтің алдын алу мақсатында арнайы көмек арналары кеңейтілуде. Өткен оқу жылында Алматыда осы мәселе бойынша 457 өтініш тіркелген. Түскен сигналдардың барлығы 111 бірыңғай байланыс желісі, сенім телефондары және арнайы кеңес беретін алаңдар арқылы қабылданды, деп хабарлайды Алматы қаласы өңірлік коммуникациялар қызметі.

Өңірлік коммуникациялар қызметінде өткен брифингте Балалардың құқықтарын қорғау басқармасының басшысы Жанат Айтпаева әрбір арыздың мұқият тексеріліп, психологтар мен әлеуметтік қызметкерлердің қатысуымен жан-жақты көмек көрсетілгенін жеткізді. Басқарма басшысының айтуынша, қазіргі таңда тек салдармен күресіп қана қоймай, буллингтің алдын алуға басымдық берілуде.

Статистикаға сүйенсек, 2025 жылы мектептерде буллингтің ықтимал белгілері туралы 638 хабарлама келіп түскен. Тексеру нәтижесінде расталған 6 факт бойынша кәмелетке толмағандардың ата-аналары немесе заңды өкілдері әкімшілік жауапкершілікке тартылды.

Сондай-ақ мектеп ортасында профилактикалық шаралар қарқынды жүргізілуде. Алматының білім беру ұйымдарында «DOSBOLLIKE» бағдарламасы аясында 112 мыңнан астам арнайы сабақ ұйымдастырылып, оған 314 мыңнан астам оқушы тартылды.

«Балалардың барлығы бірдей басына түскен қиындықты мұғалімге немесе мектеп басшылығына ашып айта бермейді. Сол себепті олар үшін қауіпсіз әрі құпия сақталатын байланыс арналарының болуы маңызды. Бүгінде оқушылар 111 байланыс орталығы, сенім телефондары және Психологиялық қолдау орталығы арқылы көмекке жүгіне алады. Бұл жүйе әр баланың үні естілуі үшін ары қарай да дамытылады», – деп атап өтті Жанат Айтпаева.

Ата-аналар мен тұрғындар бала құқығының бұзылуы бойынша Басқармаға тікелей, e-Otinish порталы немесе 111 бірыңғай нөмірі арқылы хабарласа алады. Түскен өтініштер «бір терезе» қағидаты бойынша өңделіп, тиісті мамандар жедел түрде іске қосылады.