$ 464.77 € 541.36 ₽ 5.41

Алматыда бензин, газ және дизельмен жүретін көліктер қосымша тексеріледі

Абдрахманов Мағжан
31 тамыз 2026, 16:38
Алматыда бензин, газ және дизельмен жүретін көліктер қосымша тексеріледі Сурет авторы: Алматы әкімдігі

1 қыркүйектен бастап Алматыда бензин, газ және дизель отынымен жүретін көліктер экологиялық талаптарға сәйкестігі бойынша жеке техникалық тексерістен өтеді. Бұл туралы A-parking компаниясы хабарлады.

Компания мәліметінше, жаңа тексеріс міндетті техникалық байқаудың құрамына кірмейді және бөлек рәсім ретінде жүргізіледі. Бензинмен және газбен жүретін көліктердің пайдаланылған газындағы зиянды заттар мөлшері, ал дизельді көліктердің түтін шығару деңгейі өлшенеді.

Алайда барлық көлік иесіне 1 қыркүйекте бірден тексеруден өту қажет емес. Жаңа талап осы күннен кейін кезекті міндетті техникалық байқау мерзімі келген көліктерге ғана қолданылады.

«Егер көлік 2026 жылғы 1 қыркүйекке дейін техникалық байқаудан өткен болса, берілген құжат белгіленген мерзімі аяқталғанға дейін жарамды болады. Оған дейін техникалық байқаудан немесе экологиялық тексеруден қайта өтудің қажеті жоқ», – деп түсіндірді компания.

Міндетті техникалық байқаудан бұрынғыдай кез келген жұмыс істеп тұрған орталықта өтуге болады. Ал зиянды шығарындыларды өлшейтін техникалық тексеріс қажетті жабдықтары бар аккредиттелген бекеттерде ғана жүргізіледі.

Мұндай бекеттердің тізімі A-parking сайтында жарияланбақ. Аккредиттелген бекетте көлік иесі экологиялық тексеріс пен міндетті техникалық байқаудан бір уақытта өте алады.

#Дизель #Экологиялық тексеріс

Соңғы жаңалықтар