Алматыда автобус жүргізушілері демалыссыз жұмыс істеген

Алматы қаласының ең ірі жолаушылар тасымалдаушы компаниясында 1 656 автобус жүргізушісінің еңбек заңнамасы бұзылғаны анықталды, деп хабарлады прокуратура.

«Бұзушылықтар жұмыс уақытының шектен тыс артуы, ауысымаралық демалыс уақытының қысқаруы және жүргізушілерге демалыс күндерінің берілмеуі түрінде көрініс тапты», – деп мәлімдеді прокуратура.

Мұндай жағдайлар жол қозғалысы қауіпсіздігіне теріс әсер етіп, азаматтардың өмірі мен денсаулығына қауіп төндіреді.

Құқық қорғау органдары тасымалдаушы компанияның атын атамағанымен, оның әкімшілік жауапкершілікке тартылғанын және барлық бұзушылықтардың жойылғанын хабарлады.