Алматыда Альцгеймер ауруын емдеуге арналған жаңа технология таныстырылды

Алматы қалалық жедел шұғыл көмек көрсету ауруханасында Альцгеймер ауруын емдеуге арналған инновациялық NEUROLITH заманауи аппараты таныстырылды. Бул туралы profit.kz порталы хабарлайды.

Қазақстан Орталық Азия өңірінде аталған озық технологияны клиникалық практикаға алғаш болып енгізетін мемлекет атанып отыр. Қазіргі уақытта аурухананың невролог және нейрохирург мамандары жаңа жабдықпен жұмыс істеу бойынша арнайы оқыту курсынан өтуде.

Технологияның ерекшелігі мен жұмыс принципі

NEUROLITH аппаратын швейцариялық Storz Medical компаниясы құрастырған. Жабдық бас миын инвазивті емес транскраниалды импульстік стимуляциялауға арналған. Бұл - бас терісі арқылы мидың белгілі бір аймақтарына акустикалық импульстармен қауіпсіз әрі ауырсынусыз әсер ету әдісі.

Процедураның дәлдігін қамтамасыз ету мақсатында пациенттің магнитті-резонанстық томография (МРТ) түсірілімдеріне негізделген үш өлшемді (3D) навигация жүйесі қолданылады.

Еуропа елдерінде бұл технология 2018 жылдан бері қолданылып келеді. Әзірлеушілердің мәліметінше, осы уақытқа дейін 20 мыңнан астам пациент емдік курстан өткен.

• Емдеу курсы: Екі апта ішінде жүргізілетін, ұзақтығы жарты сағаттық 6 процедурадан тұрады.

• Қауіпсіздігі: Қолданыс кезеңінде ауыр жанама әсерлер тіркелмеген.

Аппарат Альцгеймер ауруын толық айықтырмағанымен, дерттің белгілерін жеңілдетіп, пациенттердің өмір сүру сапасын айтарлықтай жақсартуға мүмкіндік береді.