Алматыда 350 құрылыс компаниясының лицензиясы тоқтатылды

Алматыда құрылыс саласына жүргізілген тексерулердің қорытындысы бойынша төрт компания лицензиясынан айырылып, тағы 350 компанияның лицензиясының күші уақытша тоқтатылды. Бұл туралы қала әкімдігі хабарлады.

Әкімдік мәліметінше, жалпы құрылыс саласында жұмыс істейтін 437 субъектіге қатысты түрлі шара қабылданған. Ведомствоның айтуынша, бұдан былай құрылыс талаптарын сақтап, сапалы жұмыс істей алатын компаниялар ғана нарықта жұмыс істеуге жіберіледі.

Мемлекеттік лицензиясынан айырылғандардың қатарында SK BEST Spec Story KZ, Отау-Құрмет және ҚазҚСҒЗИ еншілес ұйымы бар. Ал Сәулет Құрылыс Консалтингі компаниясы лицензиясының бір қосалқы түрінен айырылды.

Әкімдік бұл шешімдер құрылыс саласындағы бақылауды күшейту аясында қабылданғанын атап өтті. Бұған дейін, маусым айында, прокуратураның ұсынысы бойынша біліктілік талаптарына сәйкес келмеген 214 құрылыс компаниясының лицензиясының күші уақытша тоқтатылған болатын.