Алматыда 2027 жылдан бастап ескі көліктерді кіргізу ақылы болуы мүмкін

Алматыда экологиялық стандарттарға сай келмейтін ескі көліктердің белгілі бір аймақтарға кіруіне шектеу енгізу жоспарланып отыр. Бұл туралы қала әкімі Ерболат Досаев Медеу ауданы тұрғындарымен кездесуінде мәлімдеді. Жаңа жүйе 2027 жылдан ерте енгізілмейді.

Low emission zone (төмен шығарындылар аймағы) – бұл қаладағы ауаны тазарту мақсатында қолға алынған бастама. Заманауи экологиялық стандарттарға сай келмейтін көліктер үшін аталған аймақтарға кіру ақылы болады. Ал электромобильдер мен экологиялық таза көліктер үшін шектеу қарастырылмайды.

Қаладағы жаңа ережелердің негізгі кезеңдері:

• 2025-2027 жылдары Алматыда өнеркәсіптік шығарындылар мен көлік ластануын азайту бағдарламасы жүзеге асырылады.
• 2025 жылдың жазында ақылы автотұрақтардың бағасы едәуір қымбаттайды.
• Қаладағы интеллектуалды көлік жүйесін енгізу жұмыстары басталады.
• 2026 жылдың соңына қарай қаладағы негізгі көлік инфрақұрылымы толық дайын болады.
• 2027 жылдан бастап қалаға ескі экологиялық стандарттағы көліктердің кіруіне төлем енгізу қолға алынады.

"Барлық ірі қалаларда автотұрақтар қымбаттайды, біз де осы бағытта жұмыс істейміз. Бұл өзгерістер экологиялық жағдайды жақсартып, Алматының таза ауаға көшуіне көмектеседі", – деді Досаев.