Алматыда 1 бөлмелі пәтерді жалға алу бағасы 300 мың теңгеден асты

Алматы қаласында жаңа оқу жылының жақындауына байланысты баспана нарығында бұрын-соңды болмаған ажиотаж тіркелді. Елдің түкпір-түкпірінен студенттердің жаппай ағылуы жалға берілетін тұрғын үй бағасын рекордтық деңгейге көтерді. Жылжымайтын мүлік саласының мамандары сұраныстың тамыз айының басында-ақ артып, қазір шарықтау шегіне жетті, деп хабарлайды 31 арна.

Қазіргі уақытта нарықта бос пәтерлер өте аз, ал ұсынылып отырған баспаналардың құны айтарлықтай жоғары. Алматыда ең сұранысқа ие бір бөлмелі пәтерлердің орташа жалдау құны айына 300 мың теңгеге жуықтады. Мысалы, бұған дейін 180 мың теңгеге ұсынылған ауданы 55 шаршы метрлік қарапайым пәтерлер бүгінде 320 мың теңгеге дейін қымбаттаған. Бағаның екі есеге жуық өсуі тіпті элиттік емес тұрғын үй сегментінде де байқалуда.

Сарапшылардың мәліметінше, соңғы бір жылда Алматыда жалға берілетін баспана 15 пайызға қымбаттаған. Бағаның қалыптасуы пәтердің орналасқан ауданына тікелей байланысты:

Ең қымбат баспана Медеу және Бостандық аудандарында тіркелген, одан кейінгі орындарда Әуезов пен Алмалы аудандары тұр. КИМЭП, ҚБТУ және Сәтбаев көшесіндегі жоғары оқу орындарының жанындағы пәтерлердің бір шаршы метрі 8 мың теңгеге дейін жетеді. Ел бойынша орташа көрсеткіш - шаршы метріне 6000 теңге.

Жылжымайтын мүлік мамандарының болжамынша, жақын арада пәтерді жалға алу бағасы төмендемейді. Оған жоғары инфляция мен студенттер тарапынан толастамайтын сұраныс басты себеп болып отыр.