Алматы жастарының жобаларын 5 миилион теңгеге дейін қаржыландыратын топ-10 бастама

Алматылық жастар қаланың болашағын өз қолдарымен өзгертуге кірісті. «Жастар қатысу бюджеті – 2026» жобасы бойынша онлайн-дауыс беру аяқталып, ең үздік бастамалар анықталды. Тұрғындар арасында тартысты өткен додада 10 мыңға жуық дауыс жиналып, жеңімпаздар іріктелді.

Бұл байқауда ерекше білім беру мен денсаулықты қолдайтын жобалар топ жарды. Көш басын инклюзивті білім беру практиктер орталығы – Inclusion Lab бастаса, үздік үштікке «Ана академиясы» мен Jasyl Qala білім беру сити-фермасы енді.

Үздік ондыққа енген басқа да инновациялық жобалар:

• Kitap Hub AI – жасанды интеллект арқылы кітап оқу мәдениетін дамыту

• BabyCare – балаларды дамыту және оңалту орталығы

• Sat App – заманауи мобилді қолданба

• «Идея» және Qum Track жобалары

• «Кәсіпкер» мен «Сенім» медиажобалары

Жалпы байқауға 203 өтінім түсіп, сараптамадан өткен 122 жоба дауыс беруге жіберілген болатын. Ұйымдастырушылар әр бастамаға 500 мыңнан 5 миллион теңгеге дейін қаржы бөлуді жоспарлап отыр. Биыл 18-ден 20-ға дейін жоба жүзеге асса, алдағы уақытта бұл көрсеткішті жылына 50-ге дейін жеткізу көзделуде.